Nýleg könnun í Reykjavík sýnir aukinn fjölda hjólreiðamanna í umferðinni Borgin taldi yfir 3.500 hjól í haust
Talning á bílum og hjólum í umferðinni í Reykjavík í haust leiddi í ljós að hlutfall þeirra sem ferðast á reiðhjólum í stað bíla hefur meira en tvöfaldast, eða farið úr 0,49% í 1,26%, samkvæmt bráðabirgðaniðurstöðu umhverfis- og samgöngusviðs. Árið 2009 voru talin 1.432 hjól en 3.561 árið 2011.
Hlutfallið er í sjálfu sér ekki hátt en hafa verður í huga að talningarstaðirnir eru einkum við umferðaræðar og bílagötur. Björg Helgadóttir, verkefnisstjóri samgönguskrifstofu á umhverfis- og samgöngusviði, segir að hjólreiðamönnum hafi augljóslega fjölgað mjög frá árinu 2009, þegar þessar talningar hófust. Alltaf er talið á sama tíma, í lok september eða byrjun október, frá kl. 7 til 19 að kvöldi.
Hlutfallið er afar misjafnt eftir götum. Við Faxagötu sem liggur að Hörpu var tiltölulega lítil bílaumferð á þessum tíma og þar voru bílarnir 231 en hjólin 182. Um Skothúsveg fóru 3.636 bílar en 203 fóru hjólandi. Neðst í Suðurhlíð fóru aðeins 222 bílar en 655 hjól.
Uppruni: Morgunblaðið 14 nóv. 2011, forsíða.
