Íþrótta- og Ólympíusamband Íslands stendur í sextánda skipti fyrir Hjólað í vinnuna, heilbrigðri vinnustaðakeppni um allt land, dagana 2. – 22. maí. Verkefnið höfðar til starfsfólks á vinnustöðum landsins og hefur þátttakan margfaldast á þeim 15 árum sem liðin eru frá því að verkefnið fór af stað. Meginmarkmið Hjólað í vinnuna er að vekja athygli á virkum ferðamáta sem heilsusamlegum, umhverfisvænum og hagkvæmum samgöngumáta. Þátttakendur eru hvattir til þess að hjóla, ganga, hlaupa eða nýta annan virkan ferðamáta til og frá vinnu. Keppt er um fjölda þátttökudaga en lið geta jafnframt skráð sig í kílómetrakeppnina þar sem keppt er um heildarfjölda kílómetra.
Meðan á átakinu stendur verður skráningarleikur þar sem allir þátttakendur eiga möguleika á að vera dregnir út á Bylgjunni alla virka daga. Hjólreiðaverslunin Örninn gefur glæsilega vinninga og þann 22. maí er dregið út glæsilegt reiðhjól að verðmæti 100.000kr. Þá verður í gangi myndaleikur á Instagram, Facebook og á heimasíðunni þar sem myndasmiðir sem merkja myndina með #hjoladivinnuna geta unnið flotta hjálma frá Nutcase á Íslandi.
Fulltrúar frá Landssamtökum hjólreiðamanna og Fjallahjólaklúbbnum mættu á opnunarhátíðina og hér fylgir með upptaka af nokkrum stuttum og hressilegum hvatningarávörpum:
- Lárus L. Blöndal, forseti ÍSÍ
- Lilja Alfreðsdóttir, mennta- og menningarmálaráðherra
- Alma Dagbjört Möller, landlæknir
- Dagur B. Eggertsson, borgarstjóri
- Frímann Gunnarsson, þáttastjórnandi
Upptaka og myndir: Páll Guðjónsson