Breski hjólreiðamaðurinn Thomas Stevens varð fyrstur til að hjóla hringinn í kringum hnöttinn fyrir 124 árum.
Hjólatúrinn langa hóf hann frá San Francisco að morgni 22. apríl 1884 á svörtu 50 tommu Columbia-reiðhjóli, með sokka, spariskyrtu, regnstakk, sem einnig dugði sem tjald, svefnpoka og skammbyssu í stýristöskunni. Þaðan hjólaði hann í austurátt og var hvarvetna fagnað af hjólaklúbbum, en til Boston kom hann 4. ágúst 1884 og lauk þar með fyrsta hjólatúr sögunnar þvert yfir meginland Norður-Ameríku.
Eftir vetursetu í New York fór Thomas með gufuskipi til Liverpool í Englandi og hjólaði þaðan suður Evrópu og allt til Írans, þar sem hann dvaldi yfir vetrarmánuðina í Teheran.
Í mars 1886 steig hann aftur á reiðhjólið og hjólaði, með hjálp gufubáta yfir höfin, sem leið lá yfir Mið-Austurlönd og til Indlands þaðan sem hann sigldi yfir til Asíu. Víðast hvar lenti hann í tungumálaörðugleikum þegar hann spurði til vegar; sums staðar var honum úthýst en annars staðar fékk hann hlýjar móttökur. Ferð Thomasar lauk í Japan 17. desember 1886, eftir 13.500 mílna hjólreiðatúr, en á byrjunarreit í San Francisco kom hann aftur með reiðskjóta sinn 4. janúar 1887.
Frétt í Fréttablaðinu 4. jan. 2011
Hér má lesa meira um þetta ferðalag, ævintýrin sem hann lenti í og leiðina sem hann fór.
Og á Gutenberg.org má sækja rafrænt eintak af ferðasögu Thomas Stevens í tveimur bindum.
PG
