Lagning göngu- og hjólreiðastíga við Stekkjarbakka tafðist vegna breytinga

Frétt í {japopup type="iframe" content="http://www.mbl.is/mm/gagnasafn/grein.html?grein_id=792226" width="1000" height="600" }Morgunblaðinu 14. apríl, 2004{/japopup}

Torfæran dregur úr áhuga almennings á hjólreiðum

Lagning göngu- og hjólreiðastíga við Stekkjarbakka tafðist vegna breytinga

Ástandi stíga fyrir hjólreiðamenn er verulega ábótavant við mislæg gatnamót við Stekkjarbakka í Reykjavík, en að sögn verktaka verður lokið við stígana í kringum næstu helgi.
Elvar Arnar Reynisson hjólar reglulega um Stekkjarbakkann, og segir hann að hjólreiðafólki hafi ekki verið boðið upp á annan valkost en þann að hjóla í möl og drullu í heilt ár, eftir að göngustígnum meðfram Reykjanesbraut var mokað í burtu í apríl á síðasta ári vegna vinnu við mislæg gatnamót.

Elvar segir ástandið eins og það hefur verið algerlega óviðunandi, enda hafi stígagerð átt að vera lokið 18. október sl. samkvæmt útboðsgögnum, með bundnu slitlagi, undirgöngum undir Stekkjarbakkann og göngubrú yfir Reykjanesbraut. Elvar segir það ekki nógu gott ef stígurinn komist ekki í lag fyrir sumarið, enda sé tímabilið frá maí fram í ágúst það tímabil sem flestir nota reiðhjólið. "Og þegar svo mikilvæg samgönguæð er lokuð eða torfær, þá augljóslega minnkar áhugi hjólreiðamanna á því að nota hjólið," segir Elvar.

Stígurinn kláraður á næstu dögum

Hilmir Freyr Sigurðsson, staðarstjóri Jarðvéla við Stekkjarbakka, segir að samkvæmt útboðsgögnum hafi framkvæmdum við stígana átt að vera lokið 1. nóvember, en fyrir þann tíma hafi verkkaupi ákveðið að breyta stígnum og lækka hann, og hafi þá verklokum við þann þátt framkvæmdarinnar verið frestað. Hann segir að samkvæmt samningum eigi stígurinn að vera tilbúinn 1. maí, en vinna við hann sé vel á undan áætlun og reiknað sé með því að hann verði malbikaður öðru hvorum megin við næstu helgi.
"Við höfum reynt eins og kostur er að takmarka vinnusvæðið út frá stígnum og hreinsa hann eins og kostur er. Í vetur var þetta bara frosin möl og við vorum ekkert að vinna á þessu, en undanfarnar þrjár vikur höfum við verið að vinna í því að lækka stíginn. Því er lokið í dag og bara eftir að malbika, og þá verður málið úr sögunni," segir Hilmir.

Hætta fyrir hjólreiðamenn

Sigurður M. Grétarsson, formaður Landssamtaka hjólreiðamanna, segir það oft brenna við að hjólreiðamenn fái aðra meðferð en ökumenn bifreiða þegar framkvæmdir standa yfir. Þess vegna þurfi hjólreiðamenn og gangandi vegfarendur annað hvort að taka á sig stóran krók, eða fara inn á umferðarmannvirki sem sé ekki hannað með þá í huga, með tilheyrandi hættu.
"Það sem vantar er að menn horfi á gangstéttir sem samgöngumannvirki, menn eru ekki að gera það. Í svona verkum eru iðulega tvær dagsetningar sem verktaki þarf að standast, önnur er þegar umferð er hleypt á, og hin þegar frágangsvinnu á að vera lokið. Þannig að menn líta á það að klára stíga sem frágangsvinnu en ekki sem part af því að hleypa umferð á samgöngumannvirkið," segir Sigurður.

Segja of fáa nota stígana

Elvar segir framkvæmdina við Stekkjabakka ekkert einsdæmi, og segir yfirvöld oft hafa haldið því fram að stígagerð fyrir hjól standi ekki undir sér, þar sem svo fáir noti hjólið til samgangna.
"Ég skora því nú á yfirvöld að standa þannig að næstu framkvæmdum, til dæmis við gatnamót Miklubrautar og Kringlumýrarbrautar, að hjólandi og gangandi vegfarendur fái algjöran forgang, hjáleiðir verði malbikaðar, vel merktar og eins stuttar og hægt er, en aftur á móti yrðu hjáleiðir fyrir akandi vegfarendur þröngar, hættulegar, óupplýstar, ómerktar og ómalbikað drullusvað sem myndi tefja fyrir akandi umferð um tvö hundruð og fimmtíu prósent, eins og er gert varðandi hjólandi og gangandi umferð nú um Stekkjarbakka. Þá skulum við sjá hvort fólk fari ekki að nota hjólið til samgangna. Það er nefnilega þannig að ef engin væri sundlaugin, þá er enginn sundmaðurinn, og það sama gildir um hjólreiðafólk," segir Elvar að lokum.